Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa maanta ka qeyb galay munaasabad ballaaran oo lagu xusayay 83-guurada kasoo wareegtay aas-aaskii Ururka SYL iyo maalinta dhallinyarada Soomaaliyeed ee 15-ka May.
Munaasabadda oo lagu qabtay magaalada Muqdisho ayaa madaxweyne Xasan Sheekh ubax dhigay taallada SYL, si loo maamuuso halgankii gobannimo-doonka Soomaaliyeed iyo doorkii taariikhiga ahaa ee ay dhallinyaradii Soomaaliyeed ku lahaayeen xoreynta dalka iyo dhismaha dowladnimada Soomaaliya.
Madaxweyne Xasan Sheekh Maxamuud ayaa sheegay in halyeeyadii ku mideysnaa Ururka SYL ay ahaayeen astaan qaran oo horseeday baraarug, midnimo iyo gobannimo Soomaaliyeed, kuwaas oo saldhig u noqday helitaanka xorriyadda iyo yagleelidda dowladnimada casriga ah ee Soomaaliya.
Madaxweynaha ayaa sidoo kale xusay muhiimadda ay leedahay in jiilka cusub ee Soomaaliyeed ay ka dhaxlaan waddaniyadda, himilada iyo midnimadii ay ku caanbaxeen aas-aasayaashii SYL.
Sidoo kale, Madaxweyne Xasan Sheekh ayaa ugu baaqay dhallinyarada Soomaaliyeed inay door muuqda ka qaataan difaaca dalka, dib-u-dhiska qaranka, ilaalinta midnimada iyo horumarinta dowladnimada Soomaaliya.
Ugu dambeyn, Madaxweyne Xasan Sheekh ayaa carrabka ku adkeeyay in Soomaaliya ay u baahan tahay dhallinyaro leh aragti qaran, karti iyo mas’uuliyad wadajir ah, si loo xaqiijiyo mustaqbal nabdoon, horumar leh oo mideysan.
Si kastaba ha ahaatee, 15-ka May ayaa sanad kasta Soomaaliya looga dabaaldegaa maalinta dhallinyarada Soomaaliyeed iyo aas-aaskii Ururka SYL, oo door weyn ka qaatay halgankii gobannimo-doonka iyo xoreynta dalka.