Ugu yaraan siddeed qof oo muhaajiriin ah ayaa maydkooda laga helay xeebaha Liibiya iyo Giriiga, xilli ay sii kordhayaan khasaaraha naf-badeed ee ka dhasha socdaalka halista ah ee loo maro Badda Mediterranean-ka.
Mas’uuliyiinta ammaanka ee Liibiya ayaa xaqiijiyay in shan meyd oo muhaajiriin ah laga helay xeeb ku dhow caasimadda Tripoli, kuwaas oo la rumeysan yahay inay ka mid ahaayeen dad doonayay inay si tahriib ah uga gudbaan badda.
Dhanka kale, mas’uuliyiinta Giriigga ayaa shaaciyay in saddex qof oo kale lagu arkay meydkooda xeebta jasiiradda Crete, kaddib shil badeed oo halkaas ka dhacay.
Sida ay baahisay Wakaaladda Wararka ee Athens, mas’uuliyiinta Giriigga ayaa sidoo kale ku guuleystay inay badbaadiyaan ugu yaraan 20 qof, kaddib markii doon alwaax ah oo siday muhaajiriintaasi ay ku degtay meel u dhow xeebaha Crete.
Dadka la badbaadiyay intooda badan ayaa lagu sheegay inay u dhasheen Masar iyo Suudaan, waxaana ka mid ahaa afar carruur ah oo aan qaan-gaarin.
Dhanka Liibiya, meydadka shanta qof ayaa laga helay xeebta magaalada Qasr al-Akhyar, sida uu sheegay sarkaal ka tirsan booliska Liibiya oo lagu magacaabo Hassan Al-Ghawil.
Sarkaalka ayaa intaa ku daray in dhammaan dadkii la helay ay ahaayeen muhaajiriin Afrikaan ah, ayna ku jireen laba haween ah.
Dhacdadan ayaa imaanaysa toddobaadyo kaddib markii Hay’adda Caalamiga ah ee Socdaalka ay warbixin ku sheegtay in 53 muhaajiriin ay ku dhinteen shil badeed kale, kaddib markii doon caag ah oo ay saarnaayeen 55 qof ay ku degtay xeebta magaalada Zuwara, galbeedka Tripoli.
Mas’uuliyiinta Giriigga ayaa sidoo kale sheegay inay la tacaalayaan dhacdooyin kale oo la xiriira tahriibka ka dhacaya bariga Badda Mediterranean-ka, taasoo muujinaysa halista sii kordheysa ee ay wajahaan dadka isku dayaya inay Yurub ku gaaraan marin badeed khatar ah.
Hay’ado caalami ah iyo ururro xuquuqda aadanaha u dooda ayaa mar kale ku baaqay in la xoojiyo hawlgallada badbaadinta badda, lana helo xalal waara oo wax looga qabanayo sababaha ku riixa muhaajiriinta inay galaan safarro naftooda halis gelinaya.