Ra’iisul wasaaraha xukuumadda federaalka Soomaaliya Xamse Cabdi Barre ayaa maanta xilalkii ka qaaday Wasiiru-dowlaha Wasaaradda Batroolka iyo Macdanta, Ismaaciil Shire Jaamac, iyo Wasiiru-dowlaha Wasaaradda Beeraha iyo Waraabka, Asad C/risaaq Maxamed, sida lagu sheegay war-saxaafadeed rasmi ah oo kasoo baxay xafiiskiisa.
War-saxaafadeedka ayaa lagu caddeeyay in go’aankan uu ku saleysan yahay awoodaha dastuuriga ah ee ra’iisul wasaaraha, gaar ahaan qodobada 120-aad iyo 117-aad ee Dastuurka Jamhuuriyadda Federaalka Soomaaliya, iyo xeer-hoosaadka Golaha Wasiirrada, kuwaas oo siinaya fursad uu wax ka beddel ugu sameyn karo xubnaha xukuumadda marka ay jirto baahi shaqo.
Sidoo kale, war-saxaafadeedka ayaa lagu sheegay in isbeddelkan uu qeyb ka yahay dadaallada joogtada ah ee lagu xoojinayo waxqabadka hay’adaha dowladda, isla markaana lagu dardargelinayo howlaha wasaaradaha si loo hubiyo adeegyo hufan oo wax ku ool ah oo la gaarsiiyo shacabka Soomaaliyeed.
Ra’iisul wasaare Xamse Cabdi Barre ayaa uga mahadceliyay mas’uuliyiintii xilalka laga qaaday kaalintii ay ka qaateen howlaha qaranka muddadii ay xilalka hayeen, isagoo u rajeeyay mustaqbal wanaagsan.
Xil ka qaadistan ayaa kusoo beegmeysa xilli ay dowladda federaalka Soomaaliya waddo qorshayaal lagu hagaajinayo hannaanka shaqo ee hay’adaha dowliga ah, iyadoo si gaar ah diiradda loo saarayo kor u qaadista hufnaanta, isla xisaabtanka, iyo tayeynta maamulka.
Si kastaba ha ahaatee, isbeddelada noocan oo kale ah ayaa inta badan qeyb ka ah dib-u-habeynta joogtada ah ee lagu sameeyo qaab-dhismeedka xukuumadda, si loo waafajiyo baahiyaha cusub ee dowladnimada loona horumariyo waxqabadka guud ee hay’adaha dowladda.