Wasiirka amniga gudaha ee xukuumadda federaalka Soomaaliya Janeraal C/laahi Sheekh Ismaaciil (Fartaag) ayaa maanta shir guddoomiyay shir looga hadlayay amniga oo ka dhacay magaalada Laascaanood ee xarunta gobolka Sool.
Shirkaasi ayaa waxaa ka qeyb galay madaxweyne ku-xigeenka maamulka waqooyi Bari Soomaaliya C/rashiid Yuusuf Jibriil iyo Taliyaha ciidanka booliska Soomaaliyeed Sareeye Guuto Asad Cismaan C/laahi.
Shirka ayaa looga hadlay sidii loo xoojin lahaa amniga islamarkaana loogu diyaar-garoobi lahaa munaasabadda caleema-saarka madaxweynaha maamulka waqooyi Bari C/qaadir Firdhiye iyo ku-xigeenkiisa C/rashiid Yuusuf Jibriil.
Dhinaca kale, madaxweynaha jamhuuriyadda federaalka Soomaaliya Xasan Sheekh Maxamuud ayaa la filayaa inuu dhawaan gaaro magaalada Laascaanood, halkaasi uu kaga qeyb-gali doonno munaasabadda caleema saarka ah.
Si kastaba ha ahaatee, wafdigaan ku sugan magaalada Laascaanood ee xarunta gobolka Sool ayaa qeyb ka ah wafuud hordhac u ah safarka madaxweynaha Soomaaliya Xasan Sheekh Maxamuud, oo dhawaan halkaasi kusoo wajahan.